Ljubav se ne trži niti ne kupuje

Ne znam kak vama, ali meni je već pomalo dosta tog zdravstvenog odgoja. Kam god se okreneš samo se o tome raspravlja. I moj dvojac ko da zna da je to sad goruća tema pa cele dane doma urlaju o muškom spolnom organu. I umiru od smeha. Priroda dela svoje pa je tak normalno kaj se dečki vjutro zbude s šatorima. Veselim se danu kad bum im morala objasniti kaj se to tam „dole“ događa.

Nisam još pametna kaj bum, al bum se do tad valjda nekaj zmislila. Nemam ništ protiv da im učiteljka objasni neke stvari. Doma bumo raspravili kaj nebu jasno, a praktični dio, hteli mi to ili ne, branili ne branili, sami budu otkrili. I prije nego kaj bumo mi roditelji spremni prihvatiti činjenicu da su deca odrasla i da ih zanimaju stvari za odrasle. E sad, s kim budu praksu provodili…to bu njihova stvar. Ne bi se štela mešati. Bar sad tak mislim.

Čini mi se da smo mi roditelji nekak sve manji autoritet. Deca se sve više ponašaju kaj da su došla iz zoološkog vrta. Dok prolazim pored kakve škole za školskog odmora glavu uvlečem čim dublje morem u kaput, kapu navlečem dokle ide i pičim samo da čim prije napustim poprište. I ovak su šanse da me neko pozdravi manje od toga da dobijem na lotu. Uglavnom ak se najdete u takvoj situaciji prije da bu vam neki balonja u lice sasul hrpu uvreda na račun toga kaj sad baš tu hodate i smetate. U ovim snježnim danima riskirate i da dobijete kakvu ledenjaču u glavu. Ok, to morti i nebi bilo tak loše, morti bi mi od udarca napokon neke stvari sele na svoje mesto, ali ipak gledam da čim prije šmugnem i izgubim se iz školskog dvorišta. Jadni ti učitelji koji moraju svaki dan voditi borbe s celim razredima. Ne bi im bila u koži.

Za mojih đačkih dana nije bilo takvih koji bi se usudili učiteljicu ne pozdraviti. Imali smo poštovanja prema svima koji su hodali po školskom hodniku, s par metri iz sveg grla pozdravljali bi i podvornicu. Nije mi padalo na pamet trucirati se, terati po svojem ili pretiti učiteljici da bum poslala tatu ili mamu u školu. Ak bi neko od roditelja bil pozvan u školu onda bi doma usledil fasung po riti. Tak mi drugi put sigurno na pamet ne bi pala kakva nova psina. Danas je deci sve dozvoljeno, sve im je dostupno, svi im idu niz dlaku, dobiju kaj zaprdnu i to u roku odma. Nesmeš ga grdo pogledati, a on već tipče broj hrabrog telefona.

A zakaj? Zato kaj mi roditelji imamo sve manje vremena, i onda da bi naša milamala bila dobra i tiha kupujemo sve kaj si oni zaprdnu, uvjereni da kupujemo njihovu ljubav.  A ni jedna igračka nemre nadomestiti tih pol vure kolko bi dnevno mogli izdvojiti da se posvetimo detetu. Više mu ni ne treba, i ovak ste mu se nakon toga popeli na glavu.

Da se držimo toga, da svaki dan pol vure odvojimo da s njima zajedno nekaj delamo, morti bi ti mali ljudi drukčije doživljavali svet oko sebe. Morti se nebi događalo da jedni na druge skaču zbog grde reči ili krivog pogleda. Primimo se onda posla jer kak vele, željezo se kuje dok je vruče.